Hanne Ørstavik er ein av landets unge, etablerte forfattarar med bakgrunn frå forfattarstudiet ved Høgskolen i Telemark.

Litterær suppestasjon, Bø som forfattarby, skolebesøk, fleire bokbad, lesemaraton, aktuelt møte, modig møte, kriminelt møte, og litterær fest er blant dei mange programpostane.

Opningsfest i Gullbring

På opningsfesten fredag i Gullbring kulturanlegg får publikum møte eit knippe sentrale forfattarar. Blant desse er Eldrid Lunden som var med å starte forfattarstudiet ved Høgskolen i Telemark, og som også blei Norges første professor i litterær skrivekunst.

Andre fortfattar på opningsfesten er Anne Oterholm som inntil nyleg var leiar av Den norske forfattarforening, Lina Undrum Mariussen, som er vinnar av Tarjei Vesaas Debutantpris i 2012, Aina Villanger, Inger N. Bråtveit, Leif Høghaug og to av årets forfattarstudentar - Kaja Marie Lereng Kvernbakken og Simen Dysvik Hagen.

Ordføraren i Bø deler ut den første Bøker i Bø-prisen under opningsfesten. Festen er ei særleg markering av forfattarstudiets 30-årsjubileum.

Dag Solstad

Arrangementet "Bøker i Bø" spring også ut i frå forfattarstudiet ved Høgskolen i Telemark med Eldrid Lunden og nåverande leiar av studiet, Rune Christiansen, som drivkrefter.

Hanne Ørstavik deltek i "Aktuelt møte" medan Dag Solstad møter publikum i "Modig møte".

"Bøker i Bø" har ambisjon om å vere ein unik litteraturfestival - ung, modig og aktuell - og programmet skal spegle dette unge, modige og aktuelle i samtidslitteraturen gjennom samtalar mellom unge og etablerte forfattarar, og i møte med spennande forfattarskap og gode tekstar.

Bøker i Bø prosjekt er eit samarbeid mellom Bø kommune, Midt-Telemark Næringsutvikling, Høgskolen i Telemark, Sentrumsringen i Bø og engasjerte leselystne bokelskarar. Prosjektet har fått støtte frå Fritt Ord og Telemark fylkeskommune.