Dette er viktig nybrottsarbeid både for høgskolen og regionen, og representerer det første store steget mot universitetsstatus.

For å oppnå universitetssatus må høgskolen ha doktorgradsutdanning - dvs forskarutdanning - på minst fire fagområde.

Høgskolen har som mål å bli universitet innan 2013, anten åleine eller saman med andre.

Det eine utvalet, leia av professor Morten Chr. Melaaen ved Avdeling for teknologiske fag i Porsgrunn og med professor emeritus Rolf Ergon som utvalssekretær, har utgreidd området gass- og energisystem. Det andre utvalet, leia av professor Per Mangset ved Avdeling for allmennvitskaplege fag i Bø og med førsteamanuensis Inger Birkeland som utvalssekretær, kjem med framlegget om doktorgradsetablering på området kulturfag.

Innovasjon og nyskaping
Melaaenutvalet foreslår samrøystes at det blir etablert eit nytt doktorgradsstudium innan gass- og energisystem som tek utgangspunkt i dei fagområda ved Avdeling for teknologiske fag som er bidragsytarar til det doktorgradsstudiet høgskolen alt no tilbyr i samarbeid med Norges teknisk-naturvitskaplege universitet og nokre britiske universitet.

I tillegg til desse fagområda gjer utvalet framlegg om ei ny tverrfagleg overbygging retta inn mot forskingsbasert innovasjon og nyskaping innan ramma av god energi- og naturforvaltning.

Utvalet har lagt vekt på at studiet skal spele ei viktig rolle i den vidare industrielle og samfunnsmessige utviklinga i regionen.

Fagmiljø både i Bø, Notodden og Rauland
Mangsetutvalet foreslår samrøystes at det blir etablert eit doktorgradsstudium i kulturstudiar med ei fleirfagleg, tematisk organisering i dei to spissingsområda Kulturpolitikk og kulturformidling og Kulturproduksjon og estetisk praksis.

Studiet har fagleg basis i dei eksisterande fagmiljøa både i Bø, Notodden og Rauland.

Mangsetutvalet ser doktorgrad på dette området som eit ledd i oppbygginga av HiTs rolle i den nasjonale arbeidsdelinga mellom universitet og høgskolar, og som ein reiskap for å styrkje høgskolens relasjonar til omverda, og spesielt til regionalt kultur- og næringsliv. Doktorgradsprogrammet kan bidra til at kulturfeltet og kulturnæringane blir tydelegare som eit område med vekstpotensial.

Doktorgradprogrammet i kulturstudiar vil også bli unikt i nordisk samanheng.

Les meir i høgskoledirektørens omtale av utgreiingane: