To spellemannsprisnominasjonar til HiT

Både professor i folkemusikk ved Høgskolen i Telemark, Vidar Lande, og tidlegare folkemusikkstudent Gro Solli er nominerte til årets Spellemannspris i klassa for folkemusikk og gamaldans.

Omslaget til "Sordølen", CD som folkemusikkprofessor Vidar Lande nå er nominert til Spellemannsprisen for
ikon zoom

Omslaget til "Sordølen", CD som folkemusikkprofessor Vidar Lande nå er nominert til Spellemannsprisen for.

Vidar Lande er nominert for dobbel-CDen "Sordølen" som både i lyd og tekst presenterer utviklinga i folkemusikken frå Setesdal. CDen blei presentert under Landskappleiken i Eidfjord i fjor.

På CDen har Vidar Lande med seg Gunhild Tømmerås som gjesteartist. Ho er ein av Noregs fremste folkesongarar.

CDen " Sordølen"er spesiell på fleire måtar. Utgjevinga er forsynt med eit tospråkleg teksthefte på norsk og engelsk på heile 42 sider. Vidar Lande som sjølv er ein topputøvar på hardingfele, gir i tekstheftet grundig innsikt i det musikalske materialet.

I tillegg til Vidar Lande er gruppa "Tre begrædelige piger"  blant dei nominerte i denne klassa. Her er Gro Solli ein frontfigur. Ho har nyleg to år med folkemusikkstudium i Høgskolen i Telemark bak seg. I desse dagar er ho i studio i Rauland og spelar inn ein ny CD, nå saman med gruppa "Folk".

Spellemannprisen blir i år delt ut for 33. gang, med direktesendt show laurdag 26. februar 2005.

 

 

Ansvarlig for nettsiden Per Magnus Holtung - 10.01.2005