- Det er positivt at reduksjonen i basisløyvinga som vi fekk i 2007, nå er retta opp. For HiT medfører dette om lag 4,4 millionar kroner i 2009, seier høgskoledirektør Nils Røttingen.

- Det er óg positivt at vi får ei ny stipendiatstilling, sjølv om vi ba om tre i budsjettframlegget for 2009.

Produserer meir
På 2009-budsjettframlegget får Høgskolen i Telemark 1,4 millionar kroner ekstra fordi studentane har produsert fleire studiepoeng.

Høgskolen i Telemark har óg auka forskningsproduksjonen og konkurrerer betre om midlane som blir fordelte gjennom den resultatbaserte forskingskomponenten i tildelinga over statsbudsjettet. Det gir i underkant av 900 000 kroner i pluss neste år.

Ingen fleire ingeniørplassar
- I budsjettframlegget vårt ba vi om 50 fleire studieplassar i ingeniørutdanninga, der vi nå har god rekruttering. Men det blir ikkje foreslått løyving til studieplassar på dette området i 2009, seier Nils Røttingen.

Høgskolen i Telemark er blant dei største høgskolane i landet med over 5000 studentar og nær 600 tilsette. Framlegget til statsbudsjetttildelinga for HiT i 2009 er 468 450 000 kroner. I kroner er dette 6 prosent høgare enn det reviderte budsjettet for 2008.

Usikre
- Likevel er vi førebels litt usikre. Frå nyttår blir satsen for pensjonstrekk auka, og vi veit ennå ikkje om dette er kompensert i budsjettframlegget, seier økonomidirektør John Viflot.

- Rundt 60 prosent av budsjettet vårt er løns- og pensjonsutgifter, og dersom dette ikkje er kompensert, vil endringa i satsane auke utgiftene våre med seks millionar kroner, peikar han på.

Auka forsking i regionane
Høgskoledirektør Nils Røttingen er glad for at regjeringa har sett av seks milliardar kroner til eit løft for forsking og utvikling i regionane.

Det skal opprettast mellom fem og sju regionale forskingsfond som skal forvalte desse pengane. Den årlege avkastninga, om lag 285 millionar kroner, vil bli stilt til disposisjon frå 2010.

- Det blir svært viktig at Høgskolen i Telemark er aktiv på FoU-området og dermed kan få del i desse friske forskingsmidlane, seier han.

 

Kontaktpersonar:

• Nils Røttingen 35 57 50 05
• John Viflot 35 57 50 08