- Fyrst tenkte eg på å lage logoen i personar, men så kom eg på å bruke den som julepynt, fortel Kirstine som flytte til Noreg, nærmare bestemt Notodden, for fire år sidan.

27- åringen kjem frå ein liten stad nær Limfjorden på Nordjylland i Danmark, men ønskte å studere tekstilfag og oppleve ”fjella” og naturen i Noreg, og enda opp på Notodden.

Ho ønskte ho hadde brukt enda meir tid på illustrasjonen, men har hatt nok å hengje fingrane i ved semesterslutt.

Logoar stått sentralt
Høgskolen i Telemark kunngjorde julekortkonkurransen i oktober, og inviterte studentar og tilsette til å bli med. Vinnaren blei lovd eit honorar på 3000 kroner. Julekortet blir sendt alle høgskulen sine kontaktar i inn- og utland.

Blant forslaga markerte illustrasjonen til Kirstine seg med den enkle, naivistiske streken og relevansen den hadde til Høgskolen i Telemark.

- Illustrasjonen blei mykje sterkare når eg farga den digitalt, fortel Riis. I studietida har arbeid med logoar stått sentralt. Allereie i hennar fyrste oppgåve på teikning - bilete brukte ho høgskulens logo som tema.

Draum om eige designfirma
I haust starta Kirstine på eit toårig masterstudium i formgiving, kunst og handverk. Ho har også teke årrstudium i saum og design, teikning - bilete og praktisk pedagogisk utdanning ved studiestad Notodden. I Danmark har ho bakgrunn i nordisk og litteratur.

- Som eg har det no brenn eg mest for å arbeide med faget og trur mest på ei framtid med undervisning, men saman med systra mi har eg ein draum om å starte eit firma med designklede, fortel ho. Om det skal liggje i Danmark eller Noreg er eit ”svært” spørsmål å svare på. For tida veit ho ikkje heilt kva land ho høyrer heime i etter snart fire år i Noreg. Men dansk vil ho alltid vere.

Ein ting som er sikkert er at jula skal feiras heime i Danmark.

And og ris a la mande
- 15. desember reiser eg heim til jul. Først skal eg ein tur til København, så reiser eg heim til familien. Kirstine trur ikkje den danske jula er så ulike den norske.

- Vi et and og ris a la mande med raud saus på julaftan. Ris a la mande er ganske lik riskrem, men med mykje mandlar i, fortel Riis.
Honoraret på 3000 kroner er ei kjærkomen gåve i førjulstida og skal brukast på julegåver og semesteravgift i januar.