EnglishNå kan du setje karakter på studiet ditt
Via elektroniske skjema på nett gir studentane ved Høgskolen i Telemark si eiga vurdering av emnet dei studerer. Nå er det elektroniske skjemaet for vårsemesteret klart.
- Nå er evalueringsskjemaet klar på nett. Det er viktig at du gir di vurdering av emnet du har tatt dette semesteret, seier leiar av læringsmiljøutvalet i HiT, Lajla-Margrethe Lindskog (t.v.) og Kristin Ekmann, ansvarleg for kvalitetsikringssystemet
Eit studium består av fleire emne, og studentane gir si evaluering av kvart enkelt emne.
- Evalueringsskjemaet for emna i vårsemesteret er nytt samanlikna med det elektroniske skjemaet studentane brukte i evalueringa etter haustsemesteret, seier Kristin Ekmann, ansvarleg for kvalitetsikringssystemet for undervisningsverksemda i høgskolen.
- Det er viktig at du som student brukar evalueringsskjemaet. Det hjelper oss til å gjere studia våre enda betre. Medstudentar får nytte av di evaluering på same måte som du har nytte av evalueringa som studentane før deg gjorde.
I tillegg til undervisninga for det enkelte emnet, omfattar evalueringa i vårsemesteret også di vurdering av infrastruktur - altså bygningar, utstyr osv - og læringsmiljø.
- Rapportane frå evalueringa vil vere opne både for studentar og tilsette. Dette gjeld både eige emne og alle andre emne i høgskolen, seier Kristin Ekmann.
Spørsmåla i skjemaet har ein karakterskala der du kryssar av frå 1 til 6, og der 6 er best.
I skjemaet er det blant anna spørsmål om i kor stor grad undervisninga har motivert deg til innsats, og kor nøgd du er med organiseringa og gjennomføringa av undervisninga i emnet.
Ansvarlig for nettsiden Per Magnus Holtung - 03.04.2006