Attføringssenteret i Rauland (AIR) fekk våren 2005 status som nasjonalt kompetansesenter for arbeidsretta rehabilitering.

AIR og HiT har i lengre tid hatt nært samarbeid. Nå blir dette utvida ytterlegare.

Prosjektarbeid
Utanom samarbeid om forsknings- og utviklingsoppdrag omfattar den nye partnerskapsavtala samarbeid om etter- og vidareutdanningstilbod, åpen internettilgang til høgskolens database for forskingsarbeid, bibliotektenester, forelesarar, prosjektarbeid for studentar og hospitering ved AIR for studentar og lærarar i høgskolen.

Gjensidig marknadsføring og mulighetar for arbeid i sommarferiar for studentar er også del av partnerskapsavtala.

Masterstudentar
- Nå får vi enda betre fundament og systematikk i det samarbeidet vi har hatt i lang tid. Vi har alt hatt stor glede av dei masterstudentane som har utført sine hovudoppgåver her og av dei studentane som har hospitert ved attføringssenteret, seier AIR-direktør Svein Kostveit.

- Når vi nå er utpeika til nasjonalt kompetansesenter innan arbeidsretta rehabilitering, er auka vekt på forsking gjennom tett samarbeid med HiT og andre kunnskapsmiljø heilt nødvendig, legg han til.

Sju av ti tilbake i jobb
Sidan starten i 1986 har over 12000 brukarar vore på fire vekers opphald ved AIR. Eitt år etter rehabiliteringsopphald i Rauland er sju av ti langtidssjukemelde tilbake i jobb, viser statistikken.

Opphaldet varar normalt i fire veker. Brukarane blir tatt inn i grupper på 16-17. Gruppedeltakarane har blanda diagnosar, og kvar gruppe blir følgd opp av eit fagteam. I teamet er lege, attføringskonsulent, sjukepleiar, fysioterapeut og idrettsinstruktør.

Regional utvikling
- For Høgskolen i Telemark er dette også ei utviding av vår rolle som regional utviklingsaktør, seier Leif Aage Eilertsen, leiar for høgskolens kontor for eksternt finansiert verksemd, og pådrivar bak partnerskapsavtala.