Venture Cup er Nordens største forretningsplankonkurranse for studentar.

Den nasjonale finalen finn stad i Trondheim til hausten.

Innovator 360 SB vann i tillegg tidlegare i år den ettertrakta Ferd-prisen i årets NM for studentbedrifter, og skal med det også representere Norge i EM som går i Danmark utpå sommaren.

Bak Innovator 360 SB står Kim Kristian Humborstad, Mats Gladhaug Vassliås og Joakim Egseth Solberg.

Dei er alle studentar ved bachelorstudiet i innovasjon og entreprenørskap ved høgskolens avdeling i Bø.

Neste generasjons betalingsskort
Gjennom Innovator 360 SB utviklar dei neste generasjons betalingskort basert på radiofrekvensbasert identifisering gjennom fingeravtrykk, energifangst og databasehandtering. Dette gir kort som er langt sikrare enn dagens betalingskort.

Sidan ein av studentane i bedriften parallelt tar kurs ved BI i Oslo, kunne dei delta i regionfinalen for Venture Cup i Oslo. Her gjekk dei heilt til topps og innkasserte 10 000 kroner i prispengar.

Dobbelt HiT i Østlandsfinalen
I regionfinalen for Østlandet elles, som blei arrangert ved Universitetet for miljø- og biovitskap, gjekk SafeStep SB til topps. Her var førsteprisen på 40 000 kroner.

SmartLight SB - også dei frå Høgskolen i Telemark - kapra andreplassen og 20 000 kroner.

Drillhaldar
Safestep SB har utvikla ein drillhaldar med stikkontakt for plassering på gardintrapper. Det kan blant anna gjere ulykkesrisikoen mindre.

I årets NM for studentbedrifter fekk dei Skatteetatens regnskaps- og økonomipris.

Bak SafeStep SB står Christer Maugesten, Øystein Torgrimsby, Marius Rusten Jensen og Martin Sørmo Sorte. Alle er ingeniørstudentar ved avdelinga i Porsgrunn.

Trådlaus styring av utelys
Smart Light SB med ingeniørstudentane Kenneth Nesse, Mats Andersen, Stig Aspenes og Geir Tore Lehn Berg har utvikla eit system der ei fotocelle sender eit trådlaust signal til ein mottakar i utelampa.

Det var også dette som ga dei Ferd-prisen i årets NM for studentbedrifter. Denne prisen går til den studentbedrifta som har størst internasjonalt potensial.

HiT med tre bedrifter til den nasjonale finalen
Det er dei to beste i dei regionale finalane som går vidare til den nasjonale finalen i Venture Cup.

Med topplassering både i Oslo og nr. 1 og 2 for Østlandet vil Høgskolen i Telemark her vere representert med tre studentbedrifter.

I den nasjonale finalen vil deltakarane konkurrere om i alt 400 000 kroner i prispengar.

Studentbedrifter frå Høgskolen i Telemark har dominert NM for studentbedrifter dei siste fem åra, og har også gått til topps i EM.

Nordens største
Venture Cup er Nordens største forretningsplankonkurranse.

Deltakarane i Venture Cup må minimum vere student på bachelor- eller masternivå ved ein norsk høgskole eller universitet . Forretningsidéen kan vere tenestebasert og produktbasert.

I tillegg til regionfinalane for Østlandet og for Oslo er det tilsvarande finalar for Sør-Vest, Midt-Norge og Nord-Norge.

Studentorganisasjon
Bak Venture Cup i Norge står Start Norge, ein studentorganisasjon med 15 lokallag på universitet og høgskolar, og som jobbar for å styrkje innovasjon, nyskapning og entreprenørskap blant studentar i Norge.

Venture Cup har i tillegg samarbeidspartnarar som Tekna og Innovasjon Norge.

Gjennom Venture Cup kan deltakarane utvikle forretningsideane sine til gjennomførbare forretningsplanar. Dei får blant anna gratis rettleiing av erfarne entreprenørar, bedriftsleiarar, profesjonelle investorar og rådgjevarar.