I serien Solgt! som går på NRK torsdag 20. oktober, skal meklarstudentane Frode Bergheim Koppergård og Anne Mari Skogstad konkurrere mot to meklarstudentar frå BI. Her frå opptaket på Averøy. Foto: NRK

- Mange røynde meklarar har fått store utfordringar med å prise objekt når vi har tatt dei med utanfor sine eigne område. Difor meinte vi det var spanande å sjå korleis det går når vi gjer det same med den unge generasjonen meklarar som er nyutdanna, fortel programleiar Frode Søreide i Solgt!

Studentane overraska
Opptaket til serien blei gjort tidleg i september, og det var tredjeårsstudentane Frode Bergheim Koppergård og Anne Mari Skogstad som deltok frå Høgskolen i Telemark. Dei skulle konkurrere mot to studentar frå meklarutdanninga til BI i Oslo.

- Det var mange i redaksjonen som blei overraska over at studentane klarte seg betre i pristippinga samanlikna med dei andre deltakarane som har vore med i programmet, seier HiT-student Bergheim Koppergård. Han vil ikkje avsløre korleis det gjekk, for det kan du sjå på NRK 1 i morgon kl. 20.15.

Studentane blei sende til Kristiansund – eit område dei har lite kjennskap til frå tidlegare. Eitt av objekta meklarane måtte prøve å tippe pris på, var eit gamalt småbruk som strekker seg over tre øyer heilt yst i havgapet på Averøy. Der var det ikkje mindre enn 140 mål tomt.

Saknar Bø
Høgskolen i Telemark starta med eigedomsmeklarutdanning i 2007 og braut dermed Handelshøyskolen BI sitt monopol på eigedomsmeklarutdanning. I dag er eigedomsmeklarutdanninga ved HiT det mest søkte studiet ved høgskolen.

- Eg har hatt svært stor nytte av utdanninga. Fag som jus, praktisk eigedomsmeklarfag, delskatt og oppgjer brukar eg dagleg. Men det er mykje psykologi i faget, seier Bergheim Koppergård. Anne Mari Skogstad er samd.

- Eg likte meg utruleg godt i Bø. Eg saknar studentmiljøet, og det vart rart å ikkje skulle dra til Bø no i haust, seier Anne Mari.

Anne Mari Skogstad har fått seg jobb som eigedomsmeklar i Terras meklarkontor på Gjøvik. Bergheim Koppergård jobbar i dag som eigedomsmeklarfullmektig i Nordvik&Partners Bygdøy Allé.